لقاء الدكتورة المدربة رضاب عبد الفتاح المتخصصة في التفكير الإبداعي وإكتشاف الموهوبين وعلم النفس الإدراكي

 لقاء الدكتورة  المدربة رضاب عبد الفتاح المتخصصة في التفكير الإبداعي وإكتشاف الموهوبين وعلم النفس الإدراكي ضمن حوارات مهرجان السودان للتقرير التلفزيوني- النسخة الخامسة .

 الصادق ابوعيدة

مرحبا  بالدكتورة رضاب عبد الفتاح وتحياتنا  لكي  وكلنا حضور وحبور وسعادة بطلتك بيننا فكرا ..وتحاورا.. وتعلم وإكتساب خبرات في مجال التفكير الإبداعي وإكتشاف الموهوبين وعلم النفس الإدراكي ... نورتينا يا دكتورة  وحبابك دوما ... بك نحتفي ولكي التقدير

دكتورة  رضاب عبد الفتاح

هلا بيك .. وبكل الاخوة والاخوات الاكارم في المجموعة .. سعيدة جدا .. اني اجد من يشاركني الحديث فيما احب .. إثراءً .. واستزادة ..

الصادق ابوعيدة

نتمناها امسية تشع بهاء..وتتأتى معرفة.. وجمال..في معية دكتورة رضاب..

دكتورة  رضاب عبد الفتاح

بكم انتم النجوم التي  تلمع في سمائها

إخلاص الهادي

 جميل جدا أن تكون بيننا دكتورة رضاب  وكثيرا ما نتحدث عن التفكير الإبداعي وتدريب العقل علي الخيال اشرحي لنا كيف أن يكون التفكير الإبداعي واحدة من حالات حل المشكلات وهل المجازفة في التفكير الإبداعي مطلوبه المهارة الابداعية  كثير من الوسائل لتنميتها وحوار الاخر يحتاج لمهارات كثيرة اذا أكدنا أن الحوار مهارة ابداعية سؤالي كيف تصبح افكار الاخريين مهارة ابداعية في تنمية مهارة الحوار؟

شذا سوار الدهب

   تحية طيبة في ههذا المساء  الأنيق بتواجدكم  والدكتورة رضاب معنا تزيد الأمسية ألق وجمال ..الإبداع وعلاقته بإستخدام العقل والمحفزات؟

دكتورة  رضاب عبد الفتاح

ياسلام .. وانا كمان..فرصة طيبة أني أكون بين كوكبة متفردة ..نتفاكرفيها حول أمور تهمنا جميعا  والحمد لله  يعني بادرت  بنات جنسي بالتحايا والقبول .. ان اششعر ببعض الإلفة..في مساحة أطل فيها لاول مرة

الصادق ابوعيدة

 بسم الله نبدأ مع الدكتورة هذه الأمسية التفاكرية  يا دكتورة

دكتورة  رضاب عبد الفتاح

 نحيي الحماس والمبادرة .. وهي سمة أساسية لكل من يبحث عن التجديد ..  والابداع

 الصادق ابوعيدة

 💥 الدكتورة رضاب في هذه الأمسية  التفاكرية نقف على المحاور هذه... ومن ثم  تأتي مشاركات الحاضرين داخل القروب

🔘 دوما البدايات الأولى نستوقف عندها  لما تمثله من قيمة  وتأثير في تشكيل الشخصية ..معكي يا دكتور رضاب ننتبحر في مسيرتك التدريبية وبدايات إنطلاقتك والمحفزات التي دفعتك وكانت سببا في دخولك عوالم التدريب؟

🔘مشروع رعاية الموهوبيين ..فكرته وما يقدمه من منجزات ..مع الكيفية التي تتجلى  وتستكشف فيها سمات الموهوب ؟

🔘 هل تأثيرات البيئة تتحكم في نهج وتكوين صاحب الموهبة

🔘 التدريب  الذي يحتاجه المبدع الخلاق ليكون متميزا  في مساراته الإبداعية ؟

🔘  الإبداع والتفكير وتنمية المهارات.. وما يكتسب من مواهب خلالك نتوسع في ذلك من واقع خبراتك وتجاربك ؟

🔘 هل من طُرق او تدريبات او أساليب تقوي التفكير وتطوره  ثم  ماذا كسر قواعد التفكير او ما يسمى التفكير خارج الصندوق  ؟

🔘 نسمع بالمبدع الإستثنائي والمبدع المفكر ..والمبدع الخلاق .. ثم التفكير المنتج والتفكير المتباعد والتفكير الطارد  معك نتبين هذه المعاني والمصطلحات وصولا لليقين بها 

🔘 مابين النتائج والنواتج  من الخلق الفني والإبداعي وعمليات التفكير  ؟

🔘 العناصر المعرفية والإنفعالية  وكيفية توازنها  وتطورها.؟

🔘الاختراق الإبداعي وإشراقات الفكرة  الاولى والخاطرة مع نظرة لقبعات التفكير وفاعليتها  في المساهمة في تنشيط  وترتيب الأفكار ؟

🔘المؤثرات والعقبات   التي تحد من التفكير  وما يحتاجه الإعلامي ؟

🔘 دوما البدايات الأولى نستوقف عندها  لما تمثله من قيمة  وتأثير في تشكيل الشخصية ..معكي يا دكتور رضاب ننتبحر في مسيرتك التدريبية وبدايات إنطلاقتك والمحفزات التي دفعتك وكانت سببا في دخولك عوالم التدريب؟

دكتورة  رضاب عبد الفتاح

اسعد الله مساء الجميع بالخير والبركات كل الاخوة والاخوات في القروب سعيدة اني اكون معاكم في الأمسية دي وشكلها يعني حتكون أمسية ثرة جداً بالنقاش وبالمحتوى وبالافكار موش من عندي بس من المحاور القريته يعني المحاور القريته دي بتدل على انو عقليات معاي ماساهلة في المجموعة. احييك صراحةاستاذ الصادق إذا كانت الافكار دي جاية منك او جاية من المجموعة فهي مجموعة متفردة مافي اثنين ثلاثة انا رضاب عبدالفتاح خريجة علم نفس من جامعة الأحفاد عملت دراسات عليا في جامعة الخرطوم دبلوم عالي وماجستير في علم النفس العلاجي Clinical sychology عملت ستة او سبعة سنين في مستشفى ابن سينا كاخصائية علاج نفسي طبيعة العمل كانت مع المرضى اصحاب الامراض المزمنة يعني حمانا الله وحفظنا السرطانات والفشل الكلوي بأنواعه اسسنا صراحة هناك شغل جميل جداً في المستشفى يعني يشار إليه بالبنان كانت معاي قامات من الطب ماساهله امثال سليمان فضيل وسليمان علي اسسنا شغل جميل جداً في المستشفى مازالت يعني اثاره إلى الان موجودة بعد سبعة سنين حصلت مشاكل في طبيعة العمل هناك فاطريت اقدم استقالتي على اساس اني اتفرق للدكتورا عملت الدكتوراه كان فيها انحراف في مسار التخصص شوية هه كنت حابة اني اشتغل في مجال الموهوبين في رسالة الدكتوراه فكانت لي سبب اساسي في إني انضم للمشروع او المؤسسة اللي نحن الان بصدده او بعمل فيها انا عملت الدكتوراه وطوالي من 2005 كنا من اوئل المؤسسين للهيئة القومية لتعليم ورعاية الموهوبين بدايات عملي فيها ماسكة كنت الادارة بتاعت الارشاد المدرسي بعد كدا مسكت الادارة بتاعت القياس والتقويم او الكشف عن الاطفال الموهوبين برضو عملت فيها قريب السبعة سنين وغيرو مع اول دفعة لينا وصلت التعليم العالي قررنا نفتح وحدة لتنسيق التعليم العالي مسكتها انا واشرفت عليها وبقيت اتابع الطلاب في التعليم العالي قعدت فيها ذي سنتين كدا بعد داك مسكت ادارة التدريب بالهيئة الان انا ماسكة ادارة التدريب بالهيئة القومية لتعليم ورعاية الموهوبين.

🔘مشروع رعاية الموهوبيين ..فكرته وما يقدمه من منجزات ..مع الكيفية التي تتجلى  وتستكشف فيها سمات الموهوب ؟

مشروع تعليم ورعاية الموهوبين اللي هو الهيئة القومية لتعليم ورعاية الموهوبين هي هيئة منفصلة تحت مظلة وزارة التربية والتعليم يعني هي في النهاية مشروع حكومي مفترض الدولة تتبناو يعني احنا الدول برا  سبقتنا كثير في تعليم ورعاية الموهوبين احنا امكن رابع تجربة على مستوى الوطن العربي لكن بقت من اقوى التجارب في تعليم الموهوبين  الان في الوطن العربي الغرض منها يعني إعداد جيل او قادة للامة وربنا ذاتو بقول انو فضل الناس عن بعضهم البعض حتى في العقول يعني والامم الان بتستثمر بالعقول وليس بالموارد المادية يعني.

قررنا عمل المشروع هو بتبنى الاطفال بحاول يرعاهم اصحاب القدرات العالية بقدم ليهم نوعية مختلفة من التعليم ماموجودة في التعليم العام ببيئة ثرة شوية وغنية لانو دي واحده من متطلبات الابداع ذي ما احنا حانشوف بعد شوية وبهدف تكوين قادة ذي ماقلنا ونوعية ارقى من نوعيات التعليم طبيعة التعليم في المشروع بتاعنا فيه مدخلات كتيرة يعني قائمة على بناء الشخصيات قائمة على التعلم الذاتي الوسائل الحديثة في التعليم والتعلم النشط بنحاول بقدر الامكان عندنا مقومات كتيرة موجودة في التعليم العام ماف بنحاول نشيل خبرات على اساس تنداح للتعليم العالي ويستفيد منها

المشروع هو بستقطب الاطفال من الصف الرابع ابتدائي بعد اجراء كل الفحوصات والقياسات عليهم من الصف الثالث اللي بجتاز التصفيات قريب الثلاثة او اربعة توصيات بينضم للمدارس عندنا مدارس اساس ومدارس ثانوي والان اول دفعة هي خريجة او خريجين من الجامعات الان.

تاني سألت برضو استاذ الصادق من ضمن المحاور عن عملية الكشف على الاطفال الموهوبين او التعرف على سماتم

نحن في المنهجية بتاعتنا بنبدا ترشيح على مستوى الولاية لكل الاوائل في الفصول باعتبار انهم هم اصحاب قدرات عالية تقريباً لكن لا يشترط يعني لانو في كتير من الموهوبين هم اكاديمياً ما بالضرورة يكونو ظاهرين فبنقول الاول او المتميز وان لم يكن اول يعني اي طفل يشعر معلمة او والدينو انو عندو قدرات زائدة عن اقرانه الفي عمرو هو من المستهدفين بالنسبة لينا فما بالضرورة الاوائل اي ترشيحات بتجي من المعلمين بتجي من اولياء الامور حق لكل طفل موجود على مستوى الولاية والان الخبرة وسعت في الولايات برضو بتجرى عليهم بعض القياسات النفسية بنبدا اول حاجة بالتحصيل الاكاديمي لانو متطلب اساسي لانو مقرراتنا مختلفة شوية من مقررات التعليم العام بنجمعم كلهم في مدرسة واحدة فبتطلب المقررات قدر من القدرة العقلية تواكب الاثرا الموجود في المناهج عندنا بعد كدا بنزح الشغل بتاع الاكاديمي ديه وبنبدا في تصفيات او اختبارات بتاعات قدرات عقلية عامة بتشمل الذكاءات العقلية بانواعها وبنركز على الذكاء والابداع كمعيار للقبول اللي بيجتاز المرحلة ديه بيخضع ايضاً لي مقابلات شخصيةبنسبر فيها السمات انت سألت عن السمات ..السمات بنسبرها من خلال المقابلة الشخصية للطفل ومن التقارير من المعلمين من أولياء الامور وبتجرى عليه بعد كدا بعض الذكاءات او اختبارات الذكاء الفردية إذا اجتازه وأحرز سقف معين والسقف هو عالمي يعني ماحاجة خاصة بي هنا في السودان فسقف القبول  للموهبة هو سقف عالمي للموهبة إذا احرز السقف بتم قبوله عندنا في المدارس.  فيما يختص بسمات الموهوبين يعني في كتاب انا مااقدر اذكر كلها لأنو في خصائص معرفية وفي خصائص انفعالية وفي خصائص اجتماعية لكن القواعد حقت الاساسيات في انو الطفل دا دائماً العتبة بتاعت التعلم بتاعتو بتكون سابقة لي اقرانو بي كتير يعني بتلقى انو بتكلم في وقت بدري جداً من اقرانو او بتعلم القراءة والكتابة في سن مبكرة جداً مقارنة بي الناس الفي سنو  عندهم يلا أشياء كثيرة يعني

قوة الذاكرة

والإنتباه

وحب الاستطلاع

والتعلم وأشياء كثيرة جداً

احنا يعني لو دخلنا فيها الان ما حانخلص في كتاب يعني مرجع للدكتور فتحي جربان دا من اقوى الناس البكتبو في مجال الموهبة والابداع والتفوق يعني حتى مشرفي ودكتوري وأستاذي رد الله غيابه دكتور عمر هارون بقول دائماً انو الكتاب او المرجع دا هو يعني صحيح البخاري ومسلم في علم الموهبة والابداع اسمه التفوق والابداع والموهبة للدكتور فتحي جربان اي حاجة ليها علاقة بي تعليم الموهوبين او تعليم الابداع بتلقاها في الكتاب دا ومن اهم الكتب المفترض يكون اي انسان موجود عندو في البيت فدا يعني بدي الصورة كاملة عن سمات وخصائص الموهوبين إذا انا كان اشفيت في الحتة دي

🔘 التدريب  الذي يحتاجه المبدع الخلاق ليكون متميزا  في مساراته الإبداعية ؟

  فيما يختص بعلاقتي بالتدريب انا كنت في مشروعنا دا طبعا عندنا مادة أساسية تعليم التفكير بمهاراته وعلومه كلها كنت بدرس المادة دي  في التدريس ومن ثم  أستلمت الإشراف عليها  بعد ما بقيت إدارية كان التدريب خاص في المؤسسة كنا بندرب المعلمين وكل من ينتسب للمؤسسة من مشرفين تربوين وغيرو في مجال التفكير وسمات الموهوبين بعض الزملاء حاولوا يجروني  للتدريب خارج المؤسسة وما حاولت أقاوم الفكرة لان في النهاية بتزيد الخصوبة في التفكير لأن الاحتكاك بالآخر الخبرات التانية   هي من الأشياء المهمة في العقلية  الإبداعية  وفي الإبداع فكان من باب اولى الواحد لازم يحتك بالناس عشان يكتسب خبرات زي ما هو موجود في القروب الأسئلة صراحة رهيبة وفيها مصطلحات  دقيقة جدا حكاية  المفكر المبدع والخلاق  المنتج حقيقة دخلتوا معاي في مناطق جوهرية جدا في الابداع ...حأحاول أديكم  خلفية عن الإبداع وأنا متأكدة أنكم حتلقوا  كثير من الضالات  الأسئلة الموجودة في المحاور بعد كدا نشوف شنو نحن ما غطيناهم نحاول نغطيهو بصورة منفردة او منفصلة التفكير الابداعي عادة مربوط بالدماغ يعني الدماغ البشري والعقل بحاول في تعامل مع البيئة وأستخدامه للمثيرات اوالحواس انو يكون انماط ثابتة من خلال الخبرات من خلال إحتكاحه بالبيئة وبنظر للعالم من خلال هذه الخبرات وهذه الأنماط الثابتة وبتكون مخزون في العقل  بدي معنى للحياة وهو عمل الشق الأيسر للدماغ ..الأنماط الثابتة من وقت لآخر تتغير والفرد ما يحاول ينظر من الزاوية العمياء و يستخدم الأنماط القديمة لازم تنكسر القصة دي  وبتنكسر من خلال التفكير الإبداعي وأصبح الان هو علم يعلم  فالإنسان ما بولد بالفطرة بس هو مبدع  اي شخص يمكن أن يتعلم كيف يفكر بطريقة إبداعية  زي ما قلت يا استاذ الصادق التفكير خارج الصندوق

عندنا نوعين من التفكير هم السائدين  عندنا التفكير الرأسي بنقول عليهو VERTICAL THINKING طبيعتو متسلسلة أفكار متسلسلة بتبع المنطق التتبعي نفس النهج المتبع في الرياضيات والفيزياء في حل المسائل دا بسميهو التفكير الراسي  ودا السائد الان في العملية التعلمية في المدراس  نظم التعليم عندنا حت في الجامعات بتتبع النوع دا من التفكير نوع آخر من التفكير بنسمهيو التفكير الجانبي  LATERAL THINKING بسمع بوجود أكثر من رؤية للشي الواحد عكس التفكير الرأسي لأن انت في النهاية لازم تصل لحل واحد او إجابة واحدة التفكير الجانبي دا بيسمح انك تاخد أكتر من حالة وأكتر من رؤية ..لو جيت مثلتها  مثلا التفكير الرأسي زي الحفرة ..أنت بتحفر الحفرة وبتدخل فيها عميق  في نفس الحفرة  لكن التفكير الجانبي  حفر متعددة بتعمل ليها بناء   بمشي فيها أعمق بتوصلك لأشياء  كثيرة دا الفرق بين التفكيرين شغل التفكير الإبداعي مختص بالتفكير الجانبي وهو ماموجود عندنا في السلم التعليمي  لأن السلم التعليمي بركز على التفكير الرأسي ولو جينا للهيمنة الدماغية مسؤول منو الجانب الايسر من الدماغ  شغل التسلسل والمنطق..  التفكير الإبداعي والتفكير الجانبي هوأختصاصات الدماغ الايمن  وهو متعلق بالتصور متعلق بالبدائل بالنظرة الشمولية متعلق بالخيال ودي متطلبات التفكير الإبداعي ...دائما يقولوا كفاءة في الاداء دا  بطلب تفكير رأسي  ودا من أختصاصات الجانب الأيسر ...لكن ..فعالية الإنجاز  هي من إختصاصات الجانب الأيمناو التفكير الإبداعي

🔘 هل تأثيرات البيئة تتحكم في نهج وتكوين صاحب الموهبة ؟

في أسئلة كتيرة  وردت عن البيئة الإبداعية او المناخ الإبداعي زي ما نحنا بنسميهو يعني كيف شكل الجو المفترض يكون عشان يكون في تفكير إبداعي مسؤولية هي مسؤولية فردية مسؤولية إجتماعية حتي مسؤولية علي مستوي الدولة.. حتي نحنا لمن جينا فتحنا المدرسة بتاعتنا الخاصة  بالموهبيين دي طبعا لازم أخلق بئية ثرية بالموثيرات او المؤثرات لكي   يشتغلوا عليها الطلاب فتأسيسها يعني المعامل معامل العلوم بأنواعها الحواسيب الربورتات الالكترونات دا كلو موجود المكتبة ضخمة لمن جينا نطلب بتأسيس الأشياء دي اتذكر كانت وزراة التربية والتعليم وقت بنقول  لينا شنو رفاهية التعليم الانتو بتتكلمو عنها دي بتكلموا عن معامل و حواسيب وغرف للفنون ورياضة وميادين وملاعب ومكتبات ونحنا في مدارس إجلاس ما قادرين نوفره شنو رفاهية التعليم الانتو بتكلمو عنها دي؟ القصة ما رفاهية تعليم قصة بيئة ثرة يعني من أهم شروط المناخ الصحيح للإبداع البيئة الثرة لو ما وجدت مثيرات لوما وجدت مؤثرات في البيئة  بيئة غنية العملية التعلمية فيها حتكون مبتورة ما ح تكون كاملة  ولا حيكون في فرص للإبداع فقدر ما إنت بتوفر مثيرات للتفكير مؤثرات للتعليم كل ماكان أرض خصبة للتفكير الإبداعي يعني حتي من أساسيات التفكيروالممكن برضو تستخدمها كمعيقات بالمناسبة الميزانية لأن  التفكير الإبداعي مكلف داير صرف، داير ميزانية انت الليلة لو عندك فكرة لو عندك مشروع لو عندك حاجة عايز تعملها محتاج لأدوات محتاج لأشياء كتيرة جدا لوما اتوفرت الفكرة الإبداعية ما حتري أرض الواقع صراحة انا م عارفة اذا كان دخلتا طوالي في الغريق لأن الكلام عن التفكير  وتعليم التفكير والإبداع ضخم جدا وحديث ذو شجون زي م بقولوا

 انا حاول أغطي أهم الأشياء فيهو خشيت طوالي دغري في الغريق علي أساس نطلع بس ولو بشي مفيد  عن الفكرة عامة في البيئة الغنية من أهم الأشياء  يعني الإبداع داير صرف دير ميزانية عشان كدا تعليم الموهبين من أشياء المكلفة جدا ماديا ما كل الدول باتنا العادية دي تقدر عليها تقدر ترعاها غشان كدا سعينا انو هي تكون ضمن طوالي لمجلس الورزاء يعني تكون طوالي تحت رعاية مجلس الوزراءالوزراء طوالي لانو مافي انسان بقدر علي التكلفة الباهظة بتاعتو دي وعشان ينجح لازم من الصرف فيهو حتي انت علي مستوي البيت علي مستوي التعامل مع أولادك في البيت البيت لابد من إثراء البيئة حتحتاج ميزانية عشان تخلق ابداع في البيت لابد تجيب أدوات لابد تجيب وسائل تعليمية لابد تجيب مؤثرات عشان يقدر الطفل يتعلم منها وتديهو مجال او فرصة للإبداع او التفكير الشرط الأساسي التاني في البيئة الإبداعية غياب التهديد بكل صوره كل ماكان في تهديد باي صورة من الصور مستحيل يكون في أمان علي مستوي التربية علي مستوي التعليم علي مستوي العمل كل ماكانت في مهددات ثق تماما ان لا مجال للإبداع تهديد بكل صوره.. يمكن يظهر في الإحساس بالإحباط في الإحساس بالقلق في الإحساس بالخوف الإحساس بعدم الامان نهايك آخر صوره التي فيها العقاب او العقوبات فدي كلها بتمثل تهديد بمختلف أنواعه كل م كان في تهديد غاب الابداع تمام فمن باب أولي الشخص الباعث للإبداع ان يراعي الأشياء دي كلها مهم جدا في البيئة الإبداعية وجود التعاون والتآزر يعني إنت لوحدك ما حتقدر تصل لنهاية العملية الإبداعية اذا الليلة جيت بفكرة إبداعية محتاج فيها لدعم وسند و تأييد من الاخرين كلا يساعد بالبقدر عليه يعني انت ممكن تكون صاحب فكرة إبداعية لكن ما عندك المال لازم يجي إنسان يعينك ويأرزك بالمال مابالضرورة الجانب المادي معنويا عشان يقتنع بفكرتك و ينزلوها أرض الواقع لابد من وجود التعاون والتأرز اذا ما ساد الجو بتاع الإبداع حتي اللغة لغة الإبداع مختلفة المفترض يستخدموها الناس الكلمات المستخدمة المفاهيم  القناعات لو ما اتوجدت حوليك في الناس الحولك ح تكون انت سابح ضد التيار ماحتقدر تنفذ الحاجة الانت عايزة او العملية الابداعية تتم فالتعاون والتأرز مهم جدا في الجو والمناخ الإبداعي آخر حاجة الخبرات ذات معني

كنا بنتكلم عن المعرفة والخلفية المعلوماتية انك لازم تكون صاحب خلفيه معلوماتيه ثراء او واسعة  لو ما اتوجدت عنك خبرات ذات معني وخلقت من الخبرات معاني م حتقدر توظفي انت كتفكير إبداعي.في ممكن تكون نقدر نقول عليها مبادي ضرورية او مفاتيح عشان انا اقدر اطور بيها الشخصيه الابداعية يعني زي اشياء أسياسية او قناعات اذاما اتوجدت عندالشخص ما حيقدر يبدع اذا كان موجود نزيدها واذا ما موجود نعمل علي خلقها في الناس

🔘 هل من طُرق او تدريبات او أساليب تقوي التفكير وتطوره  ثم  ماذا كسر قواعد التفكير او ما يسمى التفكير خارج الصندوق  ؟

إذا جينا نعرف التفكير الإبداعي عندو تعريفات كتيرة ماغريبة علينا ولا جديدة والكل أنا عارفة طالما طرحت محاور قوية ذي دي ما جديد عليها تعريفات التفكير الابداعي الاتيان بالجديد ترى ما لا يراه الاخرون ترى المألوف بطريقة غير مألوفه تأتي بفكرة جديدة دي كلها يعني تعريفات للابداع اللي احب انا اذكرو انو في بعض الكلمات او المرادفات ليها علاقة بطريقة أو بأخرى بالتفكير الإبداعي وذكرت في المحاور الأن لأبد من الواحد يعرف الاختلاف بينا وهي كلها عبارة عن كلمات مفتاحية في العملية الابداعية من الكلمات دي الليها علاقة بالتفكير الابداعي الخيال

 طبعاً دا هو المفتاح الأساسي في  شغل التفكيرالإبداعي التجديد الابتكار الذكاء الاختراع الخاطرة ذي ما انت ذكرت الأنفي المحاور التفوق ذي مابرضو اتكلمتوا عن الموهبة وغيره الاكتشاف والعبقرية والفكرة والالهام والحدث فدي كلها كلمات ليها علاقة او أخرى بالتفكير الابداعي.

التفكير الإبداعي عندو مستويات بتبدأ بالأقل وبتطلع للأعمق او للارقى ممكن تدينا صورة عن انو كيف بتمشي العملية الابداعية نفسها  اول مستوى من مستويات  التفكير الإبداعي الابداع التعبيري بنسميه الابداع التعبيري والناس اللي بتسأل في المحاور عن المفكر الخلاق والمنتج  والاشياء اللي ذي دي كلها حاتلقو

اجابات ليها الأن في مستويات الإبداع أبسط مستوى في التفكير الأبداعي بنسميه الأبداع التعبيري  Expressive Creativity THINKING دا بيظهر من اسمو تعبيري في أي وسيلة تعبيرية زي مثلاً رسومات الأطفال والألوان  الناس البتكتب الشعر او القصص البتألف أغاني او بتغني الموسيقى التعبيرية دي كلها صور بتعكس لينا الإبداع التعبيري ودا من أبسط أنواع الإبداع وأول مستوى عندنا من مستويات الإبداع .

بجي بعدو الإبداع الإنتاجي ودا مذكور عندنا في المحاور الأنperdictiv creative thinking بنتهي في النهاية بمنتج بتكون عندك انتاج او تصميم معين أنت طلعت بيه ودا بتكون فيه بعض المقيدات لأنو أنت لازم التصميم أو المنتج حقك اللي أنت طلعت بيه في النهالية   لازم يقبل يكون مقبول يعني لازم تتبع منهجية معينة او منطقية معينة موش شغل فوضوي او عشوائي في النهاية لازم الفكرة اللي انت جبتها دي تقنع بيها الأخرين دا التفكير الإبداعي او التصميم ذي ما بنقول.

في المستوي الثالث من مستويات التفكير اللي هو التفكير الابتكاري دا ارقى شوية من الانتاجي Inventive CREATIVE THINKING   والناس هنا دائماً بتخلط بين Inventiveو onventionواحده بيi واحده بي o الابتكاري الابداع الابتكاري Inventive CREATIVE THINKING هو عبارة عن براعة في توظيف او استخدام مواد معينة وتطويره في منتج جديد او في شيء جديد انت بتجيب اشياء معينة بتعمل ليها توليفة عشان تستخدمه في استخدام جديد. على عكس المستوى الرابع اللي هو الابداع التجديدي أنا بشتغل على حاجة.معروفة انا بدخل عليها تحسينات وتطوير من أجل استخدامات جديدة يعني دا الفرق بين مستوى الابداع الابتكاري ومستوى الابداع التجديدي واحد اللي هو ابتكاري واحد تجديدي لأنو دائماً الشيء الشائع أنو الناس بستخدمو كلمة ابتكار مع Innovative هي تجديد أكثر من هي ابتكار والمعنى مختلف.

 أخر مستوى من مستويات التفكير الابداعي اللي هو الاقوى صعب جداً الوصول ليه هو الابداع الخيالي او مستوى الابداع الخيالي أو الانبثاقي ذي ما انت ذكرت في المحاور او الأختراقي جايه من Imaginative فهنا دي الولعة ذي ما بقولو اللي هو بمثلو ليه بي المبة المولعة الموجودة في الصور أنك اتيت بالجديد تماماً فكرة منبثقة يعني غير مسبوقة جاية نتيجة لي خيال بتظهر الحاجة دي في النظريات الموجودة كل النظريات الموجودة ذي انيشتاين ادسون فرويد كل النظريات الموجودة هي تحت مستوى الابداع الخيالي والابتكاري يعني إذا أنا جيت اعمل لي خريطة ذي كدا لي تعليم الابداع ختيت الابداع كدا في النص بتخت ذي ثلاثة دوائر اساسية حولينو الاولى لابد من وجود قاعدة معرفية انت لو ما بقت عندك قاعدة معرفية واسعة عشان تشتغل عليها مابتقدر تبدع لأنو القاعدة المعرفية دي انت بتطورة وبتحتاج لي مخزون معرفي عشان انت تقدر توظفه في العملية الابداعية يعني لو ما اتوجد ماحاتىقدر توظفه في العملية الابداعية

الحلقة الثانية خلق جو مبدع يعني جو صحيح للابداع واتكلمتو عن البيئة الابداعية وضرورياته وكدا

فلازم ايعني خلق جو ابداعي صحيح وحانتكلم عن الجو الابداعي او المناخ الابداعي الصحيح شكله كيف او صفاته كيف عامل كيف.

الحاجة الثالثة في تعليم الابداع البحث عن التناظرات أو العلاقات ذي ما ذكرتو او برضو في المحاور الارتباطات يعني دائماً حاجة اساسية او مبداء اساسي او مفهوم اساسي بتملي عليه الابداع هو البحث عن الارتباطات connection بين الأشياء يعني دائماً محاولة وجود علاقات بين الأشياء علاقات أصلاً ما موجودة أنت حاتخلق العلاقات دي ومنها بيجي الفكرة بتاعت التفكير التباعدي والتقاربي اللي الاتذكر في المحاور برضو يعني في قاعدة اساسية في المقارنات او في التناظرات ديه قاعدة اساسية في التفكير الإبداعي انك انت تبحث عن يعني كل ماظهر التشابه بين الاشياء ابحث عن الاختلاف والعكس كمان كل ماظهر الاختلاف بين الأشياء أبحث عن التشابه فدي طوالي قاعدة أساسية  في الابداع بتورينا الفكرة بتاعت التفكير التقاربي والتباعدي والتشعيبي اللي اتذكر في المحاور

🔘  الإبداع والتفكير وتنمية المهارات.. وما يكتسب من مواهب خلالك نتوسع في ذلك من واقع خبراتك وتجاربك ؟

ا🔘 نسمع بالمبدع الإستثنائي والمبدع المفكر ..والمبدع الخلاق ثم التفكير المنتج والتفكير المتباعد والتفكير الطارد  معك نتبين هذه المعاني والمصطلحات وصولا لليقين بها  ؟ مابين النتائج والنواتج  من الخلق الفني والإبداعي وعمليات التفكير  ؟

المبادئ الضرورية عشان انا اخلق بيها شخصية إبداعية دي اعتبروها شروط اعتبروها اشياء م عايزه اقول معيقات لانو المعيقات ح نجيها بعدين او أعداء الإبداع ح نجيها بعدين لاكن دي اشياء لابد تتوفر في الشخصية علي أساس يكون شخص مبدع او بترسي أبعاد الشخصية المبدعة اول الاشياء دي الثقة بالقدرة الابداعية يعني ثق في روحك بي انك انت قادر تكون شخص مبدع وما حاجه تعزيزية الان ب علوم البرامج كتيرة جدا لتنمية للتفكير الابداعي زي ما ح نقول او ح نسرد ادوات يعني عبارة عن ادوات انت بتمتلكه وبتوظفه هي ب التالي بتشغل ليك تفكيرك الابداعي فالقصة ما صعبة فالثقة في روحك  believe in yourse بي انك انت قادر انك تكون شخص مبدع دي اهم الاشياء الحاجة التانية توسيع مجال الاهتمام ما تخلي مجال اهتماماتك ضيق قدر الامكان الواحد يوسع في مجال اهتماماته بهدف التعمق في الاشياء اي حاجه يحاول  يتعمق فيها بعمق يسبر أغوار الاشياء عشان انت تقدر تستقلها والصورة التانية من توسيع مجال الاهتمام الانفتاع علي خبرات الاخارين وتجاربهم لازم تنفتح علي الاخرين وده السبب الخلاني اطلع امكن قبيل لمن قلته بدرب علي نطاق المؤسسة فضلته انو اطلع بره رغم المعاناه يعني نحن عندنا ب الزات السيدات بكون اذا إنت شغال مع مسؤليه البيت ببقى عليك صعب جدا انك تشتغل تدريب اضافي لاكن الواحد بيقاتل لانها في النهاية هي النقطة دي لابد انك تنفتح ع خبرات الاخيرين وتجاربهم علي اساس الواحد يقدر يوظفه ويقدر يستفيد منها المبدا الثالث او الشرط الثالث الاستعداد للابداع قررت انك تدون مبدع استعد للقصه دي ح تستعد ليها كيف من خلال البحث عن المعلومات وتجميعها عايز تبدع ما حاجه بتجيك براها لا انت بتسعى انك تجمع المعلومات وبتحاول تصل ليها اكبر قدر ممكن حول الموضوع قيد البحث او المناقشه او غيرو ورغبت الفرد في الاندفاع نحو الامام لو ما كانت دافعيتك عاليه جدا في انك انت عايز تمشي لي قدام عايز تطور من نفسك او عايز تطور في الشي الحواليك م حتقدر تسعي في العمليه الابداعيه بشكل صحيح ممكن ورقم أربعة برضو من الاشياء الاساسية للشخصية المبدعه البحث عن الارتباطات زي ما قلنا يعني دايما بتحاول تشوف العلاقات بين الاشياء وتربط بين الامور وزكرنا الحته دي قبيل ما في داعي نكررها تاني في تحطيم العادات العادات والتقاليد بتشكل لينا عائق الموروثه منها او التقليديه لابد من تكسير العادات عشان تاتي ب الجديد وتبدع توفير البيئة المناسبه دي اتكلمنا عنها توفير الوقت للابداع الوقت مهم جدا لانو يعني من الشروط الاساسية في العملية الابداعية هي توفير الوقت... قلنا توفير الوقت في العملية الابداعية مهم جداً لأنو انت ما حاتقدر تبدع لو ما وفرت جو لي روحك عشان تبدع لانو فيها جهد العملية الابداعية محتاجة لي جهد مابيجي الابداع بلا جهد يعني في مثلاً  بعض المؤسسات وبعض الشركات عندها مهام او شخص معين في الشركة حتى بسموه    مدير الابتكار  Director   Creativeفي الشركات او المؤسسات مهمته بس انو يوفر القصة دي في المؤسسة بعض الشركات في بعض المؤسسات البتهتم بي القصة دي في الابداع وبالتطوير وبالابتكار بتطلع سياسة انو يعني إذا كان دوام العمل 8 ساعات او غيرو بقولو للموظف 80% من وقتك دا حقنا احنا تدين فيه الحاجات الاحنا دايرنها منك 20% من وقتك حقك انت استثمره لي روحك انت على اساس ترجع لينا بعدين بي مشاريع او بي افكار ابداعية او بي تطوير او بي تحسين للمؤسسة فهنا افردو وقت للشخص على اساس انو يقدر يبدع فيه او يقدر يشتغل فيه لو ما وفرت الوقت للعملية الابداعية ما حا تتم ولا حايكون في ابداع في النهاية فتوفير الوقت من الاشياء المهمة جداً في العملية الابداعية برضو المواظبة والمثابرة يعني perseveranceلو ما كان عندك صبر برضو ما حاتكون شخص مبدع لانو مهمة شاقة جداً وفيها احساس بي المسؤلية الواحد لو ماحس لانو بتمر بي ممكن فشل كتير جداً واخطأ كتيرة جداً لي غاية ما فكرتك الابداعية ترى النور والأمثال على الحاجة دي كثيرة جداً العلماء شوف كم هائل من المحاولات الفاشلة مرو بيها حتى في النهاية وصلو لي الاشياء اللي هم دايرنها فالمثابرة او المواظبة من الاشياء المهمة جداً.

توظيف جميع الحواس يعني حتى مابقول ليك توظيف جميع الحواس لا تعظيم القصة دي يعني عندنا مثلاً في البرمجة اللغوية العصبية موش بقولو ارهاف الحواس احنا ماعايزين ارهاف حواس هنا احنا دايرين استغلال ليها بي اكبر قدر ممكن كناية عن الاستغراق في المهمة والاحساس بعمق في الحاجة اللي انت بتعمل فيها لو ما غرقت فيها بكل حواسك ما حايطلع المنتج الابداعي المعرفة برضو بقول ليك نسيان قدر معين من المعرفة حاول اتجاهلوها لانو مابالضرورة كل المعرفة اللي عندك تستخدمة عشان تبقى مبدع لا حاجة يسيرة حاجة بسيطة ممكن لو وظفتها بي طريقة سليمة تطلع شخص مبدع.

كل الكلام ده ممكن يجرنا لي الحتة بتاعت صفات الشخص المبدع لازم اعرف...الشخص المبدع متصل بشنو يعني مش بس اعرف اه لا اذا كانت هي موجودة نعمه وخير وبركة واذا ما كانت موجودة اتعلمها او احاول اكتسبها يعني حتي احنا بندرسها من أجل التعلم والاكتساب يعني مابالضرورة تكون اوردي موجودة ممكن انا لما أعرفها اتعلمها يعني حتي الرسول صلى الله عليه وسلم بقول شنو( انما الحلم بالتحلم وإنما العلم بالتعلم ) فما عايزين نقول الابداع بالتبدع لكن كناية عن انك اعرف الخصائص الواحد يعرف الخصائص ويحاول يعمل بيها اويكتسبها..من أهم الخصائص في الشخص المبدع او سماته او صفاته قدرة العالية علي التكيف مع الأمور ودي ليها علاقة كبيرة بحل المشكلات لأن الإبداع مربوط بحل المشكلات  ...المغامرة والمجازفة قبيل الواحد بسأل من المجازفة ليها علاقة بالابداع بالتأكيد روح المغامرة والاكتشاف شئ أساسي في الإبداع ...الشخص المبدع صاحب ذاكرة جيدة صاحب ذاكرة قوية بلاش قوية لكن نقول جيدة لأن هي سلاح تجاه المعرفة والكم المعرفي العندو لابد يتسلح بيهو بذاكرة قوية درجة عالية جدا من الوعي تركيزو عالي اي يحب الاستقلالية في العمل عندو حكمة ينزعج جدا من الأعمال الروتينية مايحبها عندو قدرة عالية جدا علي إتخاذ القرارات طومحو عالي جدا عقليتو منفتحة عندو درجة عالية من التوجة او التعامل مع المشكلات سنس ماحنشوف بعدين في المعايير حساسيته إتجاه المشكلات عالية جدا ان يكتشف القصور او النقص الموجود في الأشياء مرونة عالية في التفكير وطلاقة في التعبير في الكلام مابفتش علي الكلام عشان يعبر علي الشئ الجواهو عندهم قدرة عالية علي نقل أثر التعلم في المواقف الحياتية الجديدة يعني في ناس لا يعني يتعلموا حاجة يغرقوا في شبر موية الشئ الاتعلموهو مجرد مايجي شئ مشابه ليه في الحياة  مابقدرو يستفيدو من الخبرة السابقة راسهم بتضرب لا هم الحاجة البتعلموها عندهم قدره عالية علي انهم يوظفوها في مواقف حياتية مختلفة...قدرة عالية علي التخيل والتصور مقدرة برضو عالية علي ادارك التفاصيل في الأشياء وعادة التعامل مع التفاصيل ده الناس بتزهج منو ...الناس بتملو بقومو بعيبو السيدات لانو بهتمو بالتفاصيل اكثر وانتو ماعارفين الاهتمام بالتفاصيل من اهم معايير الإبداع ..يعني بنتكلم في العملية التعليمية والعملية الإبداعية يعني الاهتمام بالتفاصيل فيها مهم جدا انا بتكلم عن المواقف الحياتية مره ..والشخص المهتم بالتفاصيل ماتتضايق منو لأن لو وظفها توظيف سليم حيكون شخص مبدع..من أهم سمات الشخص المبدع ان بيهتم بالتفاصيل في العمل أو ينتبه بالتفاصيل في العمل وهي معيار من معايير او قياس الإبداع كل ماكنت بتنتبه للتفاصيل اكثر وتزكرها كل ما كانت مقدرتك علي الإبداع في الشئ عالي غياب الخوف من عقول الناس مابخافو نهائي...مقبلين.. مبادريين ..شجاعيين..بهتم بالقيم الجمالية إهتمامو بالجمال عالي جدا ..الضبط الذاتي الوعي او الاحساس بالمسؤلية..قبول وجهات نظر الآخرين...حاجة مهمة جدا ان بحب التحفيز..ويحب المدح ويحب الثناء لأن وحدة من الأشياء البتحرك الابداع التحفيزي...يعني كل ماكان في تحفيز...كل ماكان في إبداع...الشخص المبدع يحب جدا ان الناس تشكرو وتحفزو وتثني عليه يعني يستمتع جدا بالقصة دي فهو أسلوب الواحد يتبعو من أجل الإبداع ومن أجل إرضاء المبدع فادي تقريبا بعض الصفات هي كثيرة جدا الواحد لو اخدها ماحيخلص لكن دي اهمها..ممكن نتكلم شوية عن الأشياء البتعيق الإبداع او بتوقف في طريق المبدع وبرضو دي وحدة من الأشياء الاتناولتها المحاور جوه..في بعض المعيقات الداخلية يعني بتجي من الشخص نفسو من جواهو وفي بعض المعيقات لا من بره بتجيهو من الناس حوليهو فإذا جينا نتكلم عن المعيقات الخارجية البتجي من الشخص من جوه عدم مقدرة الشخص وقبولة للتغيير او التجديد تلقي إنسان نمطي مايحب التغيير نهائي..التسليم بالواقع وعدم تنشيط المخاطرة....الواقع الموجود أقبل بيهو ما احاول أغير فيه ولا اخاطر زي مازكرت الأخت قبيل في المجاسفة فبيسلم بالموجود ماعندو إستعداد ان يغيير ورضيان...قنوع جدا بالشئ الموجود قدامو ...إعمال العقل بالمنطق علي حساب الخيال ودي قاعدة ضد الإبداع ..الإبداع ماداير تحسب الأمور كلها وتمنطقها ..الإبداع داير الخيال داير التصور....الخوف من المجمهول بكون أنواع..الخوف من المجهول الخوف من المستقبل الخوف من آراء الآخرين الخوف من الجديد اي هو من معيقات الإبداع الداخلية..الإعتماد علي الغير الشخص مابيميل للاستقلالية بعتمد علي غيرو حتي في التفكير مايحب ياخد قراراتو براو ما يحاول يفتش الحلول براو حتي في العملية التعليمية بعتمد علي غيرو والان اسلوبنا بتاع التعليم قايم علي طريقة الأسبونفين يعني بتدي المعلومة جاهزة للطفل او الطالب مابتشركو فيها مابتخلي هو يتحرك معك فيها ف دي من الأشياء تعتبر من اعداء الإبداع الإعتماد على الغير سوي كان في التفكير في التعليم في غيرو برضو من الأشياء عدم الثقة في النفس او الاحساس بالقيمة الناس البتلقي اعتدادهم بنفسهم ماعالي او تقديرهم بذاتهم ماعالي وثقتهم بنفسهم ماعالي مابدو قيمة لنفسهم كافية دي وحدة من المعيقات الداخلية للابداع...التعصب او الجمود اتجاة الأفكار..واخيرا الانفعال والغضب الزايد طول ماانت شخص انفعالي طول ما تسمح لي نفسك بالغضب ماحتكون شخص مبدع ديل حاجتين بتنافو مع بعض الانفعال ...الحدة...الغضب بتنافو تماما مع الإبداع يحاول الواحد يتخلص من الأشياء دي كلها عشان يكون شخص مبدع ..ده في مايختص بالمعيقات الداخلية في معيقات خارجية ممكن تجينا من بره اوله طبعا العادات والتقاليد ومادايرة شرح كتير الحتة دي وانها تكون معيقة برضو من المعيقات الموجودة كتير عندنا في مجال العمل في مستوي البيت علي مستوي الأصدقاء وغيرو ...الغيرة الهدامة يعني الاحساس بالغيرة او الحسد  او الحاجات دي من الأشياء بالمناسبة المعيقة او المهدرة للطاقات فما بكون في إبداع والغيرة الهدامة دي موجودة علي جو العمل موجودة حتي احيانا في البيت بين الأخوان بتلقي بعض الغيرة الطفل الزكي..الطفل الناجح يعني بتلقي غيرة بين الأخوان الغيرة دي لو اتداوت واتعالجت بتكون زي الفايروس في المناخ الابداعي  مابتسمح للابداع نهائي مهما كان الجو البعيشهم عمل بيت محل ما كانت مجرد مااتوجدت الغيرة الهدامة مابقي في إبداع ..الاستهزاء بالفكرة الخيالي الناس البتسخر من الآخرين يجيبو أفكار خيالية او أفكار غريبة أو كده يسخرو منها ده شنو الكلام الغريب الانت بتقولو ده دي مسألة صعبة جدا الخلاك تفكر فيها شنو او الحاجة دي مامن شغلك ولا من اهتماماتك ما تشتغل بالموضوع ده كتير او العكس تماما يعني شنو الحاجة الهايفة الانت بتتكلم عنها المهم كل أساليب السخرية والاستهزاء الممكن تكون تجي للشخص من الأشياء الهدامة التنشئة الخاطئة القائمة علي الكبت القائمة علي عدم الحرية التهديد زي ما قلنا قبيل التلقين الحرص دي كلها أساليب او تنشئة خاطئة ضد الإبداع تماما ..النقد اللازع يعني التجريح كتير انت بس تشوف الطفل او تتكلم عن إنسان بس تشوف عيوبه وتديهو من اللهجة الحارة اوالكلام الحار في أسلوب التعامل او في أسلوب الحوار دي كلها اشياء تكتل الإبداع اللوائح والقوانين والأطر الصارمة دي كلها ضد الإبداع..التوبيخ العلني يعني عايز تشاكل طفلك تشاكلة قدام الناس عايز تلفت نظرو لحاجة معينة تهزؤ قدام الناس يعني حتي علي مستوي بيئات العمل أو غيرو اذا كان المسئول او المدير بحاول يوصل مطلبو بطريقة شوية جارحة بطريقة حارة الاستهزاء او التوبيخ قدام الناس  دي حاجة من الأشياء ضد الإبداع تماما وبتكسر الشخصية المبدعة غياب الحافز اتكلمنا عنو دور الحافز في العملية الإبداعية اذا كان مافي حافز سوي مادي او معنوي ماحيبقي في إبداع.

🔘 العناصر المعرفية والإنفعالية  وكيفية توازنها  وتطورها.؟ اختراق الإبداعي وإشراقات الفكرة  الاولى والخاطرة مع نظرة لقبعات التفكير وفاعليتها  في المساهمة في تنشيط  وترتيب الأفكار ؟

في بعض المحاور كانت بتتكلم عن اساليب تنمية التفكير او اساليب تعليم التفكير الابداعي في طبعا برامج. تعليم التفكير كتيره جدا صراحه وكلها بتملك الانسان آليات او أدوات يحرك بيها التفكير من باب أولى التفكير الابداعي ممكن اذكر بعض البرامج ودي بتقام في برامج منفصلة تدريبية وكل برنامج هو  دورة تدريبية قائمة بذاتها لكن يعني ممكن نغطي بعض البرامج دي ك فكره عامة بعد كدا يعني اذا الانا شايفاهو دا ممكن يكون سليم ممكن نشوف يعني نعمل شنو أشياء بسيطة في جو العمل تساعد على خلق الابداع في البيئة بتاعت العمل مثلا او البيت او غيرو ممكن نقدم بعض الوصايا مفترض الواحد يعمل بيها ممكن نتكلم شوية عن بعض النماذج للتقنيات او الاستراتيجيات التفكير الابداعي للمثال ذي م بقولو وليس للحصر لانو قلنا برامج التفكير كثيرة أول برامج تعليم التفكير وفيها مستويات متعدده من التفكير م بس التفكير. الابداعي بتناول اكتر من حاجه. برنامج الكورت CoRT لتعليم التفكير يعني هو عباره عن ست مستويات لتعليم التفكير جميلة جدا ابتداء من حاجه اسمها توسعت الادراك يعني بس بعلمك انت كيف ادراكك دا يكون واسع وكيف تنظر للاشياء من زاوية واحدة فحاجه very interesting وهو ست أجزاء واحدة من الأجزاء بتاعت الكورت خاصة بس بالتفكير الابداعي. فدي من البرامج بتاعت تعليم التفكير الابداعي ودي دورة قائمة بذاتها برضو في البرامج بتاعت  الاتذكرت دي في المحاور ممكن بعدين نعمل ليها تغطية بسيطة. دعامات التفكير الستة او اساليب التفكير الستة اللي هيا مشهورة بقبعات التفكير الستة لانو هي الوان بتاعت تفكير فكرة جميلة جدا رائعة بتعمل تغطيه للمشكلة او تغطية للحدث او تغطية للموقف من ست زواية مختلفه وبنتناولها بعدين بشيء من التفصيل جميلة جدا الناس بتستخدمها حتى في الاجتماعات في حل المشكلات استخدامات كتيرة في التعليم نحن في الفصل بندرس الحصة احيانا درس العلوم ودرس التربية الاسلامية بمنهجية القبعات الستة او دعامات التفكير السته ايضا من برامج تعليم التفكير البرنامج سكامبر SCAMPER وممكن دا بعدين يضفي بعض التقنيات او الاستراتيجيات الموجوده فيه برضو كل البرامج دي بتملكك ادوات آليات لتعليم التفكير بالاخص التفكير الابداعي في برنامج طبعا دا مشهور على نظائره بالحل الابداعي للمشكلات اللي هيا نظرية تريز. TRIZ دي فيها اربعين تقنية او اربعين الية او اداة للتفكير الابداعي او حل المشكلات برضو من البرامج في تاني كتير بتجي من برامج مختلفة بتعتمد اكتر شي علي الخيال بتعتمد علي نماذج الا نذكر منها بعض الامثلة عشان الواحد يقدر يغطيها ف دي تقريبا بعض البرامج للتفكير الابداعي واساسياته علي مستوى العمل مثلا او علي مستوى البيت اذا عايزين نتبع بعض الاساليب في تنمية التفكير الابداعي واحده من الأشياء طرح الاسئلة يعني دائما دي البدايات اذا بدينا خطوة بخطوة طرح الاسئلة دي بتعلم الانسان التفكير النقدي وفي نفس الوقت بتعلمو الاستكشاف التعلم الذاتي المبني علي البحث يعني الواحد بطرح الواحد يفتش عن أجوبة من خلال التعلم الذاتي لبعض الاشياء اساليب طاولات النقاش يعني الناس  تتجمع في طاولة وفي موضوع معين ، يتم النقاش في البحث فيه ودي ممكن تطبق فيها فكرت القبعات الستة او دعامات التفكير الستة برضو من الأشياء الأساسية يعني في مؤسسة مفروض تعتبر كل فكرة جديدة هي براءة اختراع يتعاملوا معاها علي هذا الاساس اذا كان في تحفيز في دعم عاطفي او وجداني للفكرة دي حتنمي روح التفكير الابداعي. حتدي ثقة بالنفس للناس حتكون في براءات إختراع كثيرة أفكار إبداعية كثيرة التعلم من خلال المشاريع ..تكون سياسة في المؤسسات  تقديم المشريع  لأنها حتعتمد على البحث الناس حتبحث حتخطط وحتنتهي بمشروع  مجموعة من الافراد حتقدم مشروع حتى على مستوى البيت ..في التعويد على ربط المعارف بالمهارات الحياتية  التقاطعات مع التخصصات الاخري يعني الواحد ما يكتفي بمجاله هو فقط يربط تخصصه  مع التخصصات الثانية   وبمجالات العمل الثانية  يشوف القاسم المشترك في ذلك  متابعة  الإختراعات والإبتكارت  في العالم دي حاجات الزول لو إتبعا  برضو بخلق جو للتعلم الإبداعي في حاجة اسمها فضاء الإبداع مثلا على مستوى المدارس بنعمل معارض بندي فرصة للطالب يبدع او يجيب منتجه ويضعه في المعرض...فالحاجة دي ممكن تعمم على مستوى العمل  أي زول عندو إختراع او إ بتكار  ممكن يعرضع للجميع لأنها بتخلق تنافس بين الناس وحماس لان تكون في مخرجات ..  بما القروب معظمه إعلاميين  في منهج او نوع من التفكير مهم جدا في الإعلان او الدعاية  اسمه التفكير التصميمي   فهو منهجية إبداعية  جدا  في الإعلان فيهو خمسة  جميلة جدا ..الواحد يشوف التحدي او المشكلة التي تواجهه  شنو بعد داك يكون بعض الافكار او المعارف الموجودة عن الناس اومفاهيم تجاههها بحاول يخلق الفرص لإيجا بدائل يختار أفضلها  فكرة  التفكير التصميم لو فتشتوا عنه جميلة جدا ومهمة  ..إذا ذكرنا بعض الاستراجيات من باب ضرب الامثلة بس لانو التقنيات كثيرةجدا حسب البرامج المذكورة في التعليم الإبداعي في حاجة اسمها التثبيت الوظيفي للاشياء بمعنى انو مثلا انت المنتجت دا يستخدم في كدا  ف الناس العادية بتشوف انو ماعندو استخدام تاني لكن استراتيجة الاستخدامات بتعلم الشخص انو كيف استخدم الأشياء استخدامات أخري مختلفة ..مثلا القلم ممكن استخدمو في شنو غير الكتابة  .. وغيرها  ف دي استراتيجيات الإبداع أو الأساليب للتفكير الإبداعي استخدامات أخري للاشياء...

ضد التثبيت الوظيفي. .الشخص في وظيفة معينة ما بس يؤدي المهمة المعنية بعد ما ينال الخبرة يحاول في مجال آخر في مجال مختلف عشان يكون في تنويع واختلاف في الخبرات ...

واحدة من الاستراجيات التانية يكون عندك منتج معين تحاول تدخل عليها بعض الأشياء بهدف التحسين والتطوير عشان يأدي مهام مختلفة  ... إستراتيجية تالتة  مستخدمة في التفكير الإبداعي (ماذا لو كدا؟ ؟) ودي بتفك عوائق الابداع بتفسح مجال للخيال ...استخدام الخيال للوصول لنتائج يعني مثلا ... (يقول ماذا لو كان في أداة لتفريغ العقل لتفادي الصدمات )وغيرها  ..الخيال شي أساسي العملية الابداعية ..

إستراتجية تانية وهي تحليل الخصائص (يعني مثلا إذا عايز يحل مشكلة الفقر  يقسم جزء جزء ويقوم بتحليل الأسباب للوصول لحل المشكلة الكبيرة الأساسية. .. إستراتجية أخري في التفكير الإبداعي  (هي عكس الأشياء  يعني مثلا بدل ما المعلم يعلم الطالب  يبقي الطلب يعلم المعلم    او الطالب يعلم نفسه أو المعلم يعلم نفسه ).. وفي برضو نظرية توليف الشتات  ودي واحدة من أساليب الإبداع واللي هي  كل ماكان في تنافر بين الأشياء تحاول تخلق شبه بينها نولف بين الاشتات ...

قبعات التفكير الست .. او كما تسمى دعامات التفكير .. هي تناول الموضوع قيد النقاش او الفكرة او المشكلة او القضية ايا كان الحدث .. من عدة زوايا " تفكير جانبي ومتوازي " بهدف اصدار قرار او حكم او حل .. من خلال ست ألوان من التفكير يجب ان تدرس بها القضية قيد البحث

١/ اللون الابيض من التفكير ويعكس ضرورة حمع اكبر عدد من المعلومات والاحصاءات حول الموضوع او الفكرة

٢/ اللون الاحمر من التفكير  ويعكس كل العواطف المرتبطة به  من قبل كل الافراد ذوي العلاقة بالموضوع او الفكرة .. وكل الاحاسيس والشعور والوجدان المرتبط بها

٣/  اللون الاسود .. ويعقد كل السلبيات المرتبطة بالموضوع والعين الناقدة .

٤/ اللون الاصفر. كل الايجابيات المرتبطة والمترتبة على القرار

٥/ اللون الاخضر . لو ن الابداع والنماء وخصوبة الافكار ..تعكس البدايل والخيارات للحلول

٦/ اللونوالازرق . النظرة الشمولية مستصحبة  كل ما تم عرضة وتمحيصة لاختيار القرار الصائب

علي يوسف

 دكتورة رضاب في اغلب المجتمعات تواجه الإعلاميين واقع المستوى الثقافي في توصل المعلومات المتعلقة بعلم النفس

برأيك ما هي الرشته المناسبة التي يعتمدها الإعلاميين في مثل هذه الحالة؟؟

دكتورة رضاب عبد الفتاح

في نقطة مهمة ما اطرقنا ليها  وهي أساس في التفكير الإبداعي وهي معايير الابداع كيف انا أحكم على الحاجة دي  كعمل إبداعي وأقيس عن طيق الإبداع .احيانا نحن المختصين بنستخدما في قياس الإبداع  لكن عامة الناس بستخدموها كأساليب  لتعليم للإبداع  عشان تتعلم الإبداع تراعي هذا المعايير ومنها تتعلم الابداع  والتفكير بطريق مختلفة  ..في بعض الكتب  وبعض المرجعيات بتسخدما كتعبير مهاري  لكن الحديث الأكثر تخصصية إنها هي معايير لقياس التفكير الأبداعي او انا بستخدمها في العملية التعليمية للإبداع  ..ممكن تستخدمها كمهارات مبدئية للإبداع ..لو داير تتعلم الإبداع أبدأه بهذه المعايير

أول المعايير هو مفهوم الطلاقة في الأفكار ولمن تقول طلاقة بجي على بال الواحد انها هي طلاقة لغويةة اوإسترسال في الحديث بسر وكدا ..لكن نحن في التفكير بنستخدمها كناية عن طلاقة الأفكار وطوالي لمن أقول طلاقة مخي بمشي للكم للعدد بتاع الأفكار فكلما إنت جبت أفكار كثيرة  لها علاقة بالشئ قيد البحث او قيد الدراسة او قيد  النقاش قيد الحوار كلما جبت أشياء كثيرة  عن الشئ المطروح للنقاش كلما كان المؤشر للإبداع اكثر ...قاعدة مهمة في التفكير الإبداعي تلاقح العقول  وعندنا في الإسلام مبدأ الشورى عشان تكون في افكار إبداعية الواحد ما يكتفي بنفسو براهو لازم يسمع من غيره ودا بعكس الفكرة بتاعت الخيارات والبدائل برضو كمهارة او إستراتيجية لتعليم التفكير الإبداعي .

المعيار الثاني هو معيار المرونة  اي مرونة الأفكار ..نوعية الأفكار تكون مختلفة .مسار التفكير ينحرف لمسار آخر ..اي الاستخدامات المختلفة للشئ الواحد فلو الحاجة الواحدة وظقتها اكتر من وظيفة اواديتا أكثر من استخدام او مسار التفكير فيها اتغير بنسميها مرونة في التفكير ..عشان أقرب الصورة أكثر عندنا واحدة من قياسات الأبداع يعني يديك شكل معين مثلا خط او خطين مستقيمين يقول ليك حاول من الخطين ديل  طلع عدد من الأشكال ..كلما تعدد الأفكار بتكون طلاقة ..وكلما تنوعت  الأشكال والوظائف تكون مرونة فمثلا الشخص ديم المرونة في التفكير ممكن من الخطيم ديل يعمل لي قلم يقول مثلا قلم رصاص  او يضيف عليهو يقول قلم حبر مثلا او قلم شينيا او قلم سبورة  وهكذا هو مسترسل في نفس الوظيفة وفي نفس مسار التفكير ونفس الشكل او الاستخدام للحاجة الواحدة وهو في النهاية قلم  وهو في النهاية ما عندو مرونة في التفكير ..الشخص العندو مرونة في التفكير حيخلق لي أستخدامات اوظائف مختلفة من نفس الخطيين المتوازيين ديل اذا عمل قلم مرة المرة الجاية مثلا يعمل طريق شارع بعد شوية يعمل سكة حديد بعد شوية يعمل بيت المهم يوظفها في وظائف مختلفة

المعايير الثالث والاهم هو معيار الأصالة  المفهو السائد لمعنى الاصاله هو الحاجة العريقة القديمة الحاجة الموجودة في التاريخ لكن الأصالة في التفكير مختلفة تماما  المقصود بيها الندرة والجدة كلما جبت فكرة نادرة ما سبقك عليها زول كلما كانت قدرتك على الإبداعي أعلى ووكلما كانت الفكرة أصيلة وحت دي بيجرى عليها علميات إحصائية بحتة عشن أقول ان هذه الفكرة أصيلة او نادرة المقياس فيها بكون بشغل إحصائي بحت بمعنى ان الفكرة إذا كان تكرار وجودها  في مجتمع الافكار او مجتمع العينة او كدا تكرار الوجود ما بين واحد في المية لخمسة في المية من الافكار المطروحة أقدر أقول أنها فكرة أصيلة ..

المعيار الرابع هو التفاصيل او الإفاضة ..لو عندك شغل اوعندك منتج او  عندك فكرة محتاج تصممها او تناقشها  لا بد من الدخول بعمق في تفاصيل الشئ أصغر التفاصيل لابد من الوقوف عليها وذكرها والإنتباه لها كلما أنتبهت للتفاصيل أكثر كلما كانت قدرتك على الابداع أعلى ..نحن واحدة من أساليب القياس للذكاء فقط بعتمد على معيار التفاصيل  .. وهي رسمة لرجل كلما أدانا تفاصيل كانت درجة ذكاء الطفل أعلى وكلما نقص تفاصيل الرسمة نقصت درجة الذكاء

المعيار الخامس  هو معيار الحساسية تجاه المشكلات  الانتباه للضعف الأنتياه للقصور لاانتباه للأشياء الممكن تخلق لي مشكلة لقدام  ..الاخطاء الموجودة بصورة تانية  كلما انتبهت وكانت حساسيتك عالية  وقوة ملاحظتك عالية كلما كانت درجة الابداع عالية ..

ديل خمسة معايير مهمة جدا  وممكن نطلق عليها مهارات للتفكير  الواحد يستخدمها كأساليب لتعلم التفكير الإبداعي ..درب نفسك  او علم نفسك على الطلاقة في الافكار وهي مختصة بالعدد ..درب نفسك على المرونة في الافكار  الاستخامات  المختلفة للتفكير مع المسارت المختلفة ..الاصالة الزول يفكر في اشياء ما فكر فيها زول قبله  ..التفاصيل  إنتبه للتفاصيل وقوة الملاحظة ..اخيرا حساسيتك تجاه الضعف والقصور والمشكلات والخطأ ..درب نفسك على المعايير دي وأكيد حتكون مبدع  بلا شك

في نظرية (سكامبر ) الدمج بين الأشياء يعني جمع الأشياء  ذات الصلة بي بعضها أو أصحاب مصلحة مشتركة نعمل ليها دمج .. في التقنية أو الإستراتجية أو الآلية بتاعت  ( الحذف) لو عايز تطور بيها العمل أو تحل بيها مشكلة ..بتجي شكل التقليص مثلا إذا عمالة زائدة ممكن تحاول تحل بيها تعمل علي العمالة الزائدة بهدف حل مشكلات ...في برضو إستراتيجية الاستبدال  وهي تبديل شي بشي آخر .. مثلا علي مستوي الإعلام ممكن تبديل المذيعين بي أفي اوجه جديدة مثلا. . أيضا ممكن الاستعانة بي خبرات لي تطوير العمل ودي من النظريات أو الاستراجيات المستخدمة نحاول إدخال خبرات مختلفة لتطوير أو إثراء البرامج وتصبح أكثر احترافية سواء إعلامية اوغيرها .. مثلا ممكن طرق بعض الموضوعات المامطروقة في الاعلام والاستعانة بي ناس مختصة لي تطوير البرامج  بعض البرامج اللي بتعكس مشاكل اليومية نزيد منها .. دي بعض الاستراجيات الموجودة في( سكامبر )ممكن نوظفها علي مستوي الاعلام ..

لكن إذا جيت اتكلم عن دور الإعلام في الإبداع لابد تكون بعض البرامج المهتمة بعرض أعمال الشخصيات المبدعة  تكون في برامج في الاعلام تحرك ثقافة الإبداع في المجتمع عن طريق عرض بعض الأعمال لي الشخصيات المبدع توثيق أعمال وسير المبدعين والمعارض للأعمال الإبداعية .. البرامج التي تهتم بي تدريب التفكير الإبداعي  .. أيضا التلاحم و التلاقح ننقل ثقافات الدول الاخري مثلا .. يعني توظيف الطاقات الإبداعية في الإعلام مهم جدا.

 ميرغني عبد الله

 فى رايك هل التفكير الابداعى الى الطفل السودانى عالى ام ماذا فى ظل الطفرة العالمية من حيث التكنلوجيا التى دخلت على العالم فى الاعوام الاخيرة ...  

    انتصار كمال

سلامات دكتورة رضاب و حبابك و انت من فتح لنا باب الابداع في السودان ... هل من افكار حول دعم مدربين متخصصين في مجال التفكير الابداعي بدورة متخصصة لتدريب مدربين في مجال الابداع بما انك الوحيدة المتخصصة الآن في الساحة التدريبية هل يمكن تخصيص دورة للابداع في الاعلام ?

دكتورة رضاب عبد الفتاح

انتصار مرحب بيك ياخي وسعيدة إني القى انسان يحتويني في القروب انتصار من اوائل الناس الاحتوتني في مجال التدريب بره بصراحه سؤالك جميل في الحته بتاعه توسيع مجال التدريب في مجال التفكير الابداعي هل ممكن انو يكون في تدريب مدربين في مجال في مجال الابداع بتقول انا المتخصصة الوحيدة في الساحةما ظنيت ي انتصار القصة تلاقح افكار مهم جدا ب المناسبه الحته بتاعه التفكير الابداعي هنا ما موظفة يعني انا الخلاني اهتم ب المجال ده واحركو بره شنو الناس بره سبقتنا كتير جدا في مجال التفكير وتعليم التفكير وتوظيف التفكير في حاجات كتير في التعليم في التنشئة في غيرو التفكير هنا في السودان مهمل ب المناسبه يعني واهم شريحه هي النشى الطالع ده والجيل الطالع بعيد جدا عن الاشياء دي يعني ما مطرق تماما يعني ثقافة الابداع لو انتشرت مهم جدا حكاية انو يكون في شغل تخصصي في التفكير الابداعي حلو جدا لاكن الساحة ماشاء الله زخيره جدا ب العقليات المبدعه علي مستوي معرفتي البسيطة عشان تطلع تفكير ابداعي عايزه عقليات متعددة ما رضاب براها لانو قبيل بنتكلم عن انو دايما تلاقح الافكارحاجة اساسية في مجال التفكير الابداعي العقلية الواحدة ما بتغطي مهما كان باي حال من الاحوال فاذا اتوجدت اتعمل منهج في الحته دي ب الاستفاده من كل العقليات المبدعة تطلع برامج قوية جدا في الجانب التخصصي ده يعني انا مجتهده براي ومقدمه بعض البرامج لكن انتي براكي حضرتي معاي قبل كده الدورات بتاعة التريز يعني انا الحاجة البدخل بيها الدوره والقين الانا بلقاهو بعد الدورة من المتدربين ما حاجه ساهلة فكل ما كان العقليات موجودة كل ما انت استفدته في الحته بتاعه الطلاقه بتاعه الافكار بصورة اوسع ف القصة عايزه ليها قعده والله حلم جميل جدا حكاية انو يكون في دورات تخصصية اعمق في المجال بتاع التدريب الابداعي عايزه ليها قعده صراحة الحته بتاعه دورات متخصصة للابداع  للاعلامين مهم جدا يعني مجالنا او نحن كمدربين في التفكير  انت بتسلم في النهاية ادوات اليات كل انسان بوظفه في مجال تخصصه براو حتي انا اضرب ليكي مثال لما بندرب معلميننا علي الشغل بختم كلامي في انو انت دفتر التحضير بتاعك كمعلم في نهايه الدفتر انا بسلمو في النهايه قريب ال 40 او 50  مهاره ده اقل شي في مجال التفكير ف بقول ليهو دي انت بتحصره كيف ح تقدر تمرن نفسك ع استخدامه كيف خاصتا انو التفكير م بنمو تلقائيا عايز تدريب زيو وزي سواقه العجلة زيو وزي تسلق الجبال زيو وزي السباحه لو ما اتدربت عليهموانت ما حتقدر تمارسو ب الشكل المطلوب ب تكلم عن التفكير الان ما بيجي تلقائيا لازم الواحد يتدرب عليهو من خلال ادوات وآليات التفكير او الاستراتجيات الموجوده في البرامج المختلفة للتفكير فبقول خت المهارات الانت اختها دي كمسميات بس في نهايه الدفتر فبعد ما تجي تدرس حاول نقي ليك اربعة منها درس بيهم الحصة او اذا وقعت في مشكلة تشوف ياتو واحد لازم تنحصر ف في مجال الاعلام انت ح تملك الاعلام او الاعلامين الجانب ده من التخصص كمية من الادوات كميه من الآليات كمية من الاستراتجيات هم اكتر الناس معرفة بانو كيف يوظفوها في مجاله يعني حتى المدرب لو ضرب امثله بضربه علي سبيل المثال وتقريب المفهوم  فكره انو الراجع الحيكون  من الاعلامين ح يكون اقوى بمليون مره من الحاجه السلمه ليهم المدرب ك ادوات لانو كل زول بيبدع في مجالو اكتر من غيرو الحاجه الانا عايزه الفت النظر ليها والبتهم الاعلامين جدا مش بس التفكير الابداعي شي اساسي مافي اتنين تلاته مهم جدا اساسيات التفكير الناقد عندهم يعني لا بد من تغطيته لابد من معرفته او الابحار فيها شويه لانو هم ناس بتعاملو مع الحقائق بتعاملو مع معلومات بتعاملو مع احداث بتعاملو مع اخبار ف التفكير الناقد بملكهم كيف هم يتسلحو تجاه الافكار دي او الاحداث بي انو تتنقل ب الشكل المطلوب القوى ما اي شي يتقبل وما اي شي يعرض لازم يعرض بطريقه ما تدي ثغرات من في الغير فمهارات التفكير الناقد من الاشياء الانا بشوفه مهمه جدا للاعلامين لانو بتعاملو مع مصادر معلومات يشوفو المعلومات دي زات صله ب الموضوع التأكد من المصادر فيها إيحاء المجادلات المناظرات يعني حاجات كتير في التفكير الناقد بتهم الاعلاميين كمرحلة قبلية للتفكير الابداعي

عائشة محمد حمداني

د. رضاب وانت دكتوره فى مجال علم النفس  المبدع احيانا تنتابه مخاوف من تقديم ما لديه من ابداع  ولو كان واثقا ..اﻻما تعذين هذا الشعور وما النصح الذى تتفضليين به لكل مبدع فى مجاله؟

امل فاروق

 كيف يمكننا ان نغيير من طريقة تفكيرنا ونحن مستسلمين لنمط  تفكير معين ، واسلوب حياة فاقده التجديد و الابداع ، من أجل استخراج طاقاتنا الكامنه والتي لاندركها في كثير من الاحيان (خليك في الsave side ) لاستثمارها ؟؟

So We aren't cereated invin

سهام بدر 

 مرحب بالدكتوره رضاب  مهتمه جدا بالحلقه المعرفيه .والحوار الجميل

·       هل الابداع انواع ومدارس مختلفة لها درجات مختلفة ايضا؟

·       هل الموهبةوالابداع  عمليه رضخت لامكانية الاكتساب واتت بفائدة ام انها فطره ؟

·       التفكير الابداعى الفنى هل يندرج تحت طائلة الموهبة والابداع بنفس الدرجة يعنى المنتج الفنى له حيز تحت العنوان الكبير الموهبة الابداع التميز.؟

دكتورة رضاب عبد الفتاح

في بعض الاسئلة جات بتحاول تفرق او تشوف العلاقة ما بين الموهبة والابداع والذكاء يعني في علاقة وبعض الدراسات بتقول علي انو اذا كان في طبعا الموهبة ليها علاقه كبيره جدا ب الابداع والابداع ليهو علاقة ب الموهبة لاكن اذا جينا ندخل عنصر الذكاء اذا هل عندو علاقة ولا لا العلاقة ما قوية شديد يعني اذا قلنا في علاقه فرضية زاد الذكاء او زاد الابداع او الموهبة الموهبة دي حاجة تانية براها لانو دي حاجة فطرية ما يمكن اكتسابه لاكن الابداع التفكير جزئية من الذكاء ممكن تكون مكتسبة فبهمنا الجانب العندو علاقة باكتساب الان  الموهبة دي خلاص اتعرف مفهومه شنو لانو دي حاجه فطريه الشي المكتسب الاهو التفكير والذكاء بيناتم علاقة طردية الي حد ما يعني نحن عندنا في درجات الذكاء الناس المعدل بتاع الذكاء فق المتوسط بيبدأ من 120 الي اعلي اقصي درجات للذكاء ممكن تصل 160 ده اعلى درجات الذكاء الموجودة الان حاليا سواء كان على مستوي السودان عندنا طفل احرزه والان الطفل ده للاسف استقطبتو قطر يعني كان درجة ذكاءه 160 زي انشتايند ف المعدل فوق المتوسط للذكاء من 120 والموهبه من 130 الي اعلي حتي 120 في ترتيب درجه ارتباط عاليه جدا ين الذكاء والابداع بمعني انو علاقه طرديه عالية او ارتباط عالي جدا كل ما كان الذكاء عالي كل ما كان درجه الابداع عالية لاكن بعد ال120 درجه الارتباط ده بينفك ما عندو علاقة ب الابداع يعني ما ب الضرورة اذا زاد ذكائي بقي 130او 140 انو ابداعي ح يزيد معاهو لا ابدا ومثال لي الحاجه دي في كتير من الناس المتفوقين   واوئل الشهادة السودانية وأوئل الدفع في الجامعات اكادميا او معرفيا ومعلوماتيا  ما في زول بحصلهم لاكن لمن تجي لي المنتج الابداعي او العمل التطبيقي البره او المهارات التطبيقية البره بتلقاها زيرو او م بينجحو فيها نهائي والعكس صحيح تلقي انو تلقى انو انسان  تحصيلو الاكاديمي ضعيف او المعرفه عندو محدوده لاكن عندو درجه بتاعه ابداع عالية جدا فما في مقياس للمسألة دي ابسط شي يعني قصه مشهوره لي اذكاء رجل في العالم كانت درجة ذكاءه 195 كلستوفرد لانك في منو هسي بعرفو و منو السمع عندو ده اذكي رجل في العالم كان درجة ذكاءه الشخصية دي ما ظاهره في اذهان الناس في حين انو ذكاءه يفووق مليون مره درجه ذكاء انشتاين واديسون وديل نسبة ذكاهم كانت 160 ليه ما ظهر عشان ما شخصية مبدعة وما عندو مخرجات ما عندو نتاج ما عندو ابتكارات زي ما موجود في العلماء التانين ممكن  طوالي دي اربطوها بي معوقات الابداع في اتكلمنا عنها بي البيئه الابداعيه المناخ الابداعي معناها كان في حواليهه ظروف سواء كانت معيقات داخليه او خارجيه منعتو من انو هو يظهر او يطلع شخص مبدع ف القصه ما عندها علاقه وده واحد من الناس الي ذكاءه امبير عالي جدا ضارب فوق لاكن ما عندو اي مخرج ابداعي ف القصه ما عندها علاقة بي بعض ده لي الناس البتسأل بين الموهبة والذكاء والابداع والعلاقة بينهم

 خالد علي خير الله

 التحية لكي مجدداً د/رضاب على هذا الرفد والتداعي الجميل

❄حدثينا عن كيفية خلود الفكرة؟   وماهية الافكار التي وجدت لتبقى؟  ومراحل صقل الافكار وتقديمها للمتلقى؟

❄كيف يتعرف المبدع على الانا الزائفة ويتقلب عليها؟

❄كثيرة هي تقلبات الحياة وسرعتها كيف يستطيع الانسان ان يحافظ على تركيزه حول موضوع معين او فكرة معينة في ظل كل هذه الملهيات؟

❄إلى اي مدى يمكننا تطبيع الطبع في التغلب على كثير من المعوقات التي تفرضها بيئة معينة في ظروف محددة؟

 دكتورة  رضاب عبد الفتاح

 استاذ خالد علي خيرالله صراحة سأل أسئلة جميلة جدا. حكاية صقل الافكار ومراحلها وتقديمها للمتلقي .دي طوالي بتعكسها لي العملية الإبداعية والعملية الإبداعية ممرحلة من ما تتولد الفكرة لغاية مايظهر المنتج الابداعي في النهاية هناك.في قريب سبعة أو ثمانية مراحل للعملية الإبداعية. تبدا من تتناول صقل الأفكار زي ما سألت منها وعشان يعني فيها تفاصيل دقيقة وانا اتمني انك تشوفها بي تفاصيلها ممكن في النت تفتش عنها لانو في الكتب هي ما موجودة لانو هي صراحة منتج عبقري لطارق السويداني اسمو(آلة الابداع)آلة الإبداع دي بتاخدك في مراحل صقل الافكار ديه وتقديمها للمتلقي بأدق التفاصيل الممكنة.واحنا قبيل كنا بتتكلم عن التفاصيل؛ف بياخدك خطوة خطوة ف بخليك كيف تحافظ علي فكرتك وحتي لو عندك فكرة وما عارف تمشي بيها   لي قدام بوريك كيف تمشي بيها لي قدام . ابحث عن آلة الابداع ل طارق السويدان حتلقي فيها العجب العجاب في الحته ديه. وحكاية الأنا الزائفة كيف الواحد يتقلب عليها لانو الشخص المبدع ممكن يصاب بالغرور ودي موجودة ما نقدر ننفيها ابدا لكن ماكل الشخصيات المبدعة تصل حد الغرور لانو اصلا ملهية في اشياء ف دنيتها مابخليها تنتبه لي نفسها نهائي  لانو معظم المبدعين مهملين وبعيشو عالم من الفوضي وجو من الفوضى علي مستواي الشخصي علي  مستواي المظهر واشياء كتييير مابتخليهم يركزو في روحهم كتير لي درجة تكون عندهم انا زائفة اوغرور أو غيرو لكن ان كيف انها هي اتوجدت والزول ما منتبه للحالة دي في روحو يعني ما شايف حولين رقبتو زي مابقولو ف ماعندو حل غير الناس الحولينو يوروهو الأنا الزائفة  بتاعتو دي و بالمنطق يعني تمنطقوا بالمنطق  بينتهي منها .والحتة بتاعت التركيز والمشتات وكيف انت تتغلب علي المشتتات دي  سمة اساسية في الشخصية واحنا قبيل كنا بنتكلم عنها قوتو علي التركيز عالية جدا وقوة علي التحكم في المشتتات عالية جدا ف مجرد ما انت بتقول ف الكلام ده بتدي ايحاء لي روحك بتثبيت الفكرة شيلها من بالك تماما وتعامل مع صفات الشخص المبدع في انو لازوم الواحد يكون عندو قدرة عالية جدا علي التحكم في المشتتات ودي صفه ولمن نقول صفة اوسمات احيانا بتكون حاجة موجودة أصلا فطريا ف الشخص واذا مافي ف الواحد يدرب روحو عليها ف واحدة من الأشياء الأساسية اذا الشخص هين يستجيب لي اي مشتت برة مستحيل يكون عندو مخرج ابداعي اويقدر يبدع لان الابداع ده داير تركيز داير استغراق في الفكرة زي ما كنا بنتكلم قبيل الواحد بينسي روحو والحاجة دي فيها علاقة البحوث اثبتت انو  في علاقة طردية ما بين الابداع مابين الذكاء ومابين التركيز الهو الاستغراق ف المهمة كل مازاد الابداع وكل مازاد الذكاء زادت درجات التركيز وقوة التحمل في المشتتات ف هي بعد كده ليك الحكم انت بعد الكلام ده يعني درب نفسك علي القصة دي يا تتعامل معاهاعلي انها حاجة (انت)  والافضل انك تتدرب عليها لانو بقول ليك من صفات المبدعين أو الموهوبين انو صعب انك تقنعهم يبدو عمل معين لانو لوماحسو فيه بالتحدي والاستفزاز العقلي ليهم ما حيبدو ليك المهمة دي الحاجات البسيطة الهايفة السطحية ما حيبدوها ليك وصعب جدا اذا بدو حاجة يخلوها كناية عن الاستغراق في الشئ كناية علي انهم بيغرقو بركزو شديد جدا ف الحاجة يعني ممكن يقعدو فيها بالساعات الطوال انش طاين ادسون كان بقعد في الساعات الطويلة ف المختبر حقو لغاية ما اكتشف النظرية بتاعتو بتاعت المصباح لمن ما اهلو وزوجتو فقدوهو بالساعات الطولية وبالايام حتي زوجتو قالت ليه اطلع شوية من الجو ده وحاول وعيش ليك حاجة برة شوية تفرحك تلقي فيها راحتك شوف ليك مكان ارتاح فيه غير الانت بتعمل فيه في المعمل ده قال ليها لو اصلك بتتكلمي عن راحتي انا ماشي محل راحتي ورجع تاني للمختبر بتاعو البركز فيه بالساعات. ف الشخص المبدع عندو قدرة عالية جدا في التحكم في المشتتات والتركيز العالي. ف راجع روحك في الحتة دي واتمني اكون جاوبته اجابة شافية .حكاية التطبيع والتغلب علي المعوقات لازم وما كانت الآن وجدت علوم التفكير.علوم التفكير الان موجودة وأن التفكير أصبح  ويعلم عشان تتغلب علي الحاجة دي علي اساس انك تتغلب علي طبعك اذا الطبع مافيه ابداع تتعلم الابداع .فنرجع لوحدة من صفات المبدعين الإصرار والعزيمة والمثابرة سمة أساسية في المبدع عشان يقدر يتغلب بيها علي المعوقات الموجودة حولينو علي الظروف البيئية البتحدمن انو يكون عندو عطاء أو يبدع .ف انت امشي ركز شوية في الجزئية بتاعت الصفات والسمات بتاعت الشخص المبدع حتلقاها جاوبت علي معظم الاسئلة الانت طارحها  الآن.

فدوى احمد

 🔘بعد إذنك حدثينا أكثر عن التفكير الناقد؟

دكتورة  رضاب عبد الفتاح

 التفكير الناقد .. عالم آخر لكن مهم جدا للاعلامي .. ممكن يفرد ليو لقاء  آخر

هيثم الريح

 ▪كيف يستطيع المذيع السيطرة علي الانفعال والتوتر الداخلي وتوازن ذلك مع لغة وحركة الجسد ؟

▪تنمية مهارات التفكير قبل الحديث فكثير مما نقوله نكاد لانسمعه فضلا أن نعيه  .. أمن طرق تنمي هذه المهارة؟

دكتورة  رضاب عبد الفتاح

 السيطرة والانفعال .. بالاسترخاء وتوقع كل شي والاستعداد له .. ودي من مهارات توسعة الادراك .. وضع جميع العوامل في الحسبان ..

اما النقطة الثانية فهي سعة الادراك .. بمهاراته .. تسلحك لمواقف حياتية كتيرة .. اقرا عنها في برنامج الكورت للتفكير .. مفيدة جدا

طيب انتمني يعني نكون قدمنا شئ لوبسيط لانو صراحة عالم التفكير والابداع عالم كبيير. لكن اذا جيت اقدم وصية 🔸اوبعض الاشياء المفترض الواحد يختها في بالو كوصية فعلا اخيرة زي ما قال استاذ الصادق ارجع واقول الواحد بقدر الإمكان يحزر من الايحاءت السلبية سواء كان لي روحك أو انك تديها غيرك لانها دي من الأشياء القاتلة للابداع عالج نفسك وحاول غيير من عاداتك السالبة اذا عندك عادات سالبةبتاعت تشتت الانتباه عدم التركيز عدم تحميس تفكيرك يعني انك تفكر وتاتي بالجديد حاول درب نفسك شوية شوية علي العملية دي اتعلم اساليب قتل الافكار عشان تجنبها يعني في كلمات في اشياء انت لو قلتها بتقتل بيها الافكار الابداعية. فتزكرو النقاط الكنا نتحدث عنها الداخلية والخارجية دي اساليب قتل الافكار ف الواحد لازم يعرفها عشان يتجنبها تمام. مفترض الشخص يدرب نفسو علي تحريك خيالو بستمرار. وفي بعض الكتب بتوريك انت عشان تعمل خيال تعمل شنو ١.٢.٣عشان تفكر بي طريقة تقدر تعمل فيها الخيال والتصور. استخدم طاقة عقلك باقصي قدرة ممكنة وماتحرم نفسك من لذة التفكير ممكن برضو حب التعلم ف الواحد ممكن يعلم نفسو حب التعلم وانو ويولد الافكار  والخيارات والبدائل بشكل مستمر. برضو درب نفسك ودرب غيرك علي عدم التسرع والحكم علي الاشياء بطريقة سريعة لانو التفكير  الإبداعي عايز تامل عايز تدبر عايز صب الاعماق ف الحاجة فما تحكم سريع ف بيعلمك ما تحكم علي الاشياء بتسرع والدفاعية فلابد من التأمل والتروي والبحث عن أصغر الاشياء دي من الأشياء الواحد يدرب نفسو عليها. وقبلو الرأي الآخر من الأشياء الواحد بوصي بيها شديد استخدم أسلوب الثواب  والتحفيز للانجاز والابداع سواء كان علي مستواء الافكار اوالعمل شخص انجز جاب فكرة ابداعية حفزو وارفع من معنوياته وحتي انت حفز روحك. اد حق فرصة تجريب ليك ولي غيرك وآخر حاجة ممكن نقوله ادي نفسك فرصة انك تجرب والتجريب شئ اساسي ف العملية الابداعية وما تخلي زول يعتمد عليك  أو انت تعتمد علي غيرك جرب براك وخلي غيرك يجرب براهو عسي ولعلي تكون روشتة سريعة في التفكير الإبداعي اتمني اكون قدمت شئ مفيد مايختص بالتفكير الابداعي. وصراحة شاكرة كتيير لي حضوركم ولوماظروف عائلية واسرية الواحد كان قعد فترة اطول لكن يعد انو يكون في لقاءت تانية كتيير حتي  انا اخدمن ناس مش بس الناس تاخد مننا وحتكون صور كاملة بإذن الرحمن .شكرا كتيير علي الصبر وعلي الاصغاء لغاية ما نتلاقي في لقاءت اخري شكرا جزيلا

الصادق ابوعيدة

 شكرنا وتقديرنا اللامحدود  لما  قدمتي من جمال.. وما عرضتي من فكر.. وما بحتي به من معرفة ..

 دمتي بالف خير دكتورة رضاب عبد الفتاح ووفقتي ابدا وسرمدا.. والى الامام

دكتورة رضاب عبد الفتاح

 ما اسعدني واستمتعت به جدا .. في هذة المجموعة المتفردة صراحة .. ولفت نظري .. اللغة العالية جدا في الحديث واختيار الكلمات والتعبير الدقيق استمتعت بها حتى النخاع .. ولا عجب فأنا بين اهل الحديث والحوار  والتلاعب بالكلمات واللغة وهذه سمة اساسية في الموهبة .. الحصيلة اللغوية العالية .. ومعيار للكشف والاختيار والتشخيص  .. شكرا كتير .. ا. الصادق على الاستضافة .. شكرا كتير للحضور الكريم .. على آمل اللقاءفي مواطن جمال أخرى ..